نتا لي كاتقرا هاد البوسط مايمكنش ماتكونش عارف امازون ولا فايت ليك سمعتي عليه شي حاجا.. واخا نفتارضو ماكاتعرفش شناهوا امازون..
امازون اسيدي هو واحد الموقع عالمي لي تقدر تشري منو اي حاجا. بحال jumia ولكن هادا نيفو هارب بزاف على jumia, لان اصلا امازون كايكون فيه البيع بالجملة. يعني كايلتاجأو ليه غير الشركات لي عندهم سطوكاج كبير هوما لي كايبيعو فيه بزاف.
مزيان عرفنا دابا اشناهوا هاد امازون.
ولكن الأغلبية كايسحاب ليهم امازون غير هادشي لياش كايليق صافي.
ولكن فالحقيقة امازون من غير ما انك تق،ر تشري منو .. تقدر ترجعو مصدر دخل ديالك او تصور منو الملاين.
كيفاش هادشي ؟؟؟
هادشي لي غادي ناقشو ليوم ..
غادي نهضرو على 4 الطرق لي تقدر تخدم بيهم فأمازون او دخل فلوس صحيحة.
الطريقة اللولة هي.
amazon FBA.
امازون إف بي أ .. بإختصار هي انك متلا كايكون عندك شي برودوي ..
متلا انا شركة كانصنع الشارجورات ديال التيليفون .. بغيت نبيع هاد الشارجورات ولكن كاعرفاش كيفاش ..
من بين الحوايج لي نقدر ندير هي كونط amazon FBA .. او غادي نشد متلا 10 لاف شارجور .. غادي نسيفطهم للسطوك د امازون لي كاين فميريكان .. طبيعت الحال ماشي غير اجي او سيفط .. خاصك بزااف .. ولكن حنا غير كانشرحو طريقة د الخدمة .. المهم كاتسيفطهم لأمازون .. امازون كايحط دوك الشارجورات فالسطوط ديالو .. او كايتحط البرودوي ديالك فالسيت د امازون .. ايلا متلا شي واحد شرا داك الشارج من امازون .. الشركة د امازون هي لي كاتكلف او كاتوصل ليه الشارج تال دار او هي لي كاتخضر معاه او كولشي .. يعني نتا كاتبقا المهمة ديالك هي دير اشهار لداك البرودوي او امازون غاتكلف بكولشي.
مزيان هادي الطريقة لولة.
الطريقة التانية
amazon publishing
هاد الشركة فيها 3 الطرق.
الطريقة اللولة
هي انك كاتكتب كتاب الكتروني كاترفو لأمازون او اي واحد شرا داك الكتاب باش اقراه امازون كاتعطيك نسبة د الربح ديالك.
فين غادي اقراه .. غادي اقراه ف kindle هاد كيندل اسيدي هو واحد الجهاز لوحي صنعاتو امازون .. كايكونو فيه غير الكتوبا صافي .. ولكن هاد الكتوبا باش تقراهم خاصك تشريهم .. منين غادي تشريهم من السيت ديال امازون طبعا.
يعني ايلا كنتي كاتشوف راسك تقدر تكتب شي كتاب لي فيه شي حاجا مفيدة .. توكل على الله.
الطريقة التانية
هي نفسها نيت الطريقة اللولة ولكن هاد المرة بلاصت مايشريو الكتاب باش اقراوه فكيندل .. كايشريو الكتاب ورقي .. غادي تقول ليا كيفاش غادي نطبع الكتاب ديال باش نسيفطو ليه .. نتا ماعندك ماطبع او ماعندك ماتسيفط.
الخدمة ديالك نتا هي انك كاتكتب كتاب الكتروني او كاترفعو لأمازون .، ايلا جا شي واحد شراه امازون كاطبع داك الكتاب فوراق او كاتسيفطو ليه او نتا كاتعطيط واحد النسبة ديال الربح.
الطريقة التالتة.
هي انك كاتبيع كتب صوتية .. كاين نعام اسيدي واحد البروغرام صاوباتو امازون سميتو audible .. هاد البروغرام فيه غير الكتب الصوتية .. متلا انا مافيا لي اقرا شي كتاب .. كاندخل لي Audible كانشوف الكتاب لي بغيت كانشريه على شكل صوت او نتسنط ليه..
يعني طريقة الخدمة واضحة كاتسجل كتاب او كاترفعو لأمازون او كاتبدا تبيعو امازون او تعطيك نسبة ديال الربح.
مزيان سالينا الطريقة د amazon publishing.
دابا ارا لينا الطريقة التالتة.
amazon affiliate program
هاد الطريقة هي انك كاتسجل فأمازون افيلايت ..
او كايكون برودويات .. كادخل لشي برودوي كاتاخد ليان ديالو .. او داك الرابط كايكون خاص بيك بوحدك.. كاتبدا تنشر داك الرابط فالفيسبوك ولا فدير ليه اشهار المهم هو انه اي واحد دخل من داك الرابط ديالك او شرا داك البرودوي امازوز كاتعطيك واحد النسبة مئوية من التمن ديال البرودوي .. على ماكانضن 4% واقيلا ماعقلتش..
المهم هادي الطريقة التالتة .
الطريقة الرابعة والأخيرة هي.
merch by amazon
ميرش امازون هو انك كاتبيع تيشورتات فيهم شي كتبة ولا شي تصميم معين.
متلا اليوم العالمي للأم .. غاتقاد شي تصويرة فيها مثلا احبك امي .. غادي ترفعها لأمازون على شكل تيشرت .. اي واحد شرا عندهم داك التيشرت .. كايطبعو ليه فيه ديك تصويرة او اسيفطوه ليه .. او كايعطيوك واحد النسبة معينة .. متلا باعو التيشرت ب 200 درهم غايعطيوك نتا 60 درهم..
كانو هادو هوما الطرق بربعة لي تقدر تخدم فيهم فأمازون.
انا ماجيتش نشرح كولا طريقة بالتفصيل الممل .. فقط عطيت نضرة كيفاش كاتكون الخدمة فكولا حاجا ا لي عجبات شي طريقة رة غايمشي اقلب عليها ويبحث مزيان..
اه او بالمناسبة هاد الطريقة اللخرة ديال التيشورتات ماكايناش غير فأمازون كيانة فبزاف د المواقع ..
