اليوم غادي ندوي على موضوع يمكن الأغلبية اللي بداو فالدروبشبينغ تيعانيو منو.. هو.. و الأكثر من ذلك متيبغيوش الناس ديال إيباي يرجعوه ليك.. و إلا مشيتي حتى فتحتي كونط جديد حتى هو فالبلاصة تيحيد.. علاش تيوقع هادش ؟ و علاش بلاما ندير حتى مخالفة تيتسد ليا الكونط.. هادشي اللي غادي ندويو عليه.. و على أهم الحوايج اللي تيخليو السيسطام ديال إيباي يسد الكونط ديالنا.. و فآخر الموضوع ديالنا غادي نقول ليكم شنو خاصك دير فاش تيتسد ليك الكونط و نعرفو واش يمكن لينا نفتحو حساب جديد أو لا... #aji_afham #aji_tafhem
مشينا .. على بركة الله...
أول مشكل هو الزربة ديالنا.. نعم أخويا.. كاين اللي غير تيجي تيبدا يدروبي فإيباي.. أول منتج ليه على إيباي هو دروبشبينع.. و هنا هو الغلط الكبير.. حيت السيسطام ديال إيباي تيعتابر الحسابات الجديدة و تتخدم على الدروبشبينغ حسابات وهمية أو حسابات سبام.. داكشي علاش تيحذفها مع أول ليستينغ لينا.. هنا تيطلبو منك تعيط ليهم.. و تهضر معاهم.. باش يعرفو باللي أنت إنسان حقيقي.. فعلا واخا شوية تيضحك هاد الشرط.. لكن راه هو اللي كاين... “ ? are you human”
شنو الحل ؟ الحل هو تبدا أخي أختي تحط منتجات ديالك، ساعات.. كتب.. ديكورات.. غير هو دير بالك مع الشبينغ أو طريقة الشحن و خلي الثمن ديالو في حدود 40 أو 50 دولار.. و دير مثلا شركة <FEDEX> <DHL > اللي هما اللي عندهم حق النقل الدولي بالمغرب.. أمانة صدقات غير وسيط تيشري الخدمة حتى هو من عندهم... علاش قلنا دير الثمن غالي فالشبينغ حيت داكشي اللي كاين هذا هو أقل سعر باش يسيفطو ليك من المغرب.. تقدر تلقى شركات النقل الدولي الصغيرة.. حتى هي مصرح لها بالشحن الجوي.. لكن تتبقى غير مضمونة.. أو إلا عندك تجربة معاهم و تايق فيهم راه تقدر تلقا اللي سيفط ليك غير ب 100 درهم للشحنة.. إلا متتفوتش نصف كيلو غرام... المهم عندك واسع النظر فهاد القضية.. أنا اللي تيهمني هو تحط منتجات ديالك فبداية الأمر.. و باش ميكونش عندك مشكل قلت ليك حط ثمن شحن على حسب شركات النقل الدولي.. باش حتى إلا عندك الزهر و دازت المبيعة متوحلش فالثمن و تولي خاسر من جيبك أو تبقى تتهرب على اللي شرا من عندك حيت مقدرتيش تسيفط ليه المنتج حيت الشحن غالي.. تحط المنتجات لمدة اسبوع شهر.. اللي بغيتي.. من بعد مثلا 15 يوم.. و من بعد ما تكون حطيتي شي عشرة أو عشرين منتج ديالك.. ماسوقناش اتباع أو لا.. أهم حاجة هو نكسب الثقة ديال إيباي و السيسطام ديالو.. من بعد قلنا تتبدا تختار المنتجات اللي تقدر ديرها فالدروبشبينغ... و خدم مع راسك...
معلومة مهمة باش نجاوب على الناس اللي تتسول آش تيقولو ليك فاش تتعيط ليهم : الدروبشبينغ متاح و مسموح به على إيباي و لا يشكل أي خطر على الحساب ديالك.. يعني فاش تعيط عليهم و لا تتراسل معاهم حاول تكون واضح معاهم و تقول ليهم بغيت نبيع شي حويجات دياولي و من بعد بغيت ندير الدروبشبينغ ماشي بالضرورة تقول ليهم اسم الشركات أو المواقع اللي تدروبي منهم.. لكن فقط قوليهم باللي عندهم خدمة الشحن سريعة و متتفوتش 15 اليوم.. خدمة ما بعد البيع كاينة.. نقدرو نرجعو المنتج أو قيمة المنتج فحالة إلا ما الزبون معجبوش أو تراجع على القرار ديالو.. هادشي اللي باغين يسمعو منك تبقا دخل و تخرج فالهضرة.. غادي يقول ليك سمح ليا منقدرش نحل ليك المشكل ديالك..
ثاني مشكل هو متنجاوبوش على الرسائل ديال إيباي اللي تيسيفطو لينا أو متناخدوش الوقت حتى نقراوهم.. و هنا تنقولو لإيباي باللي احنا ماشي مهنيين.. احنا غير باغين نقضيو واحد الغرض وغادين فحالنا.. لهلا يقلب شي رسالة و لا شي ميساج..
الحل ؟ الحل هو جاوب أخي.. و فهم اش قالو ليك.. كان غير شي عرض أو إعلان.. صافي دير راسك قريتيه .. كان شي سؤال و لا تساؤل جاوبهم و تناقش معاهم..
ثالث مشكل هو عدم القدرة ديالنا على التواصل مع الزبناء و هنا تيكون مشكل اللغة فالمقام الأول.. متنفهموهش اش بغا يقول لينا.. و هنا يا إما تنديرو بحال إلى ما قرينا والو أو تنجاوبوه بجواب غير مفهوم.. هنا حتى هو مشكل..
الحل ؟ الحل هو الترجمة عطا الله مواقع ديال الترجمة و التطبيقات ديال الترجمة ترجم اش قال ليك و ترجم اش غادي تقول ليه.. و تواصل ديما معاه..
رابع مشكل هو الكوبي كولي.. واخا السيسطام ديال إيباي محصن البحث ديالو من الناس اللي تدير الكوبي كولي إلا فاش تتكون شي مراجعة لشي كونط مثلا طالب يتحيد ليه الليميت.. ديك الساعة تيحيدو ليه الكونط حيت تيلقاو باللي مكوبي شي سطور على قدو.. نفس التصاور نفس البروداكت.. نفس الثمن.. لا الثمن الثمن مهبط الثمن...
الحل ؟ الحل هو نبدلو شوية غير ثلاثين فالمية من الحاجة و راه مغاديش تبقى كوبي كولي.. غادي تولي ديالنا.. نبدلو التصاور.. نفس الفكرة تبقى لكن نبدل الألوان و الشكل و الخلفية.. العنوان نبدل العنوان نجيب شي حاجة مرادفة للكلمات و ها هو العنوان مبقاش كوبي كولي.. الثمن الثمن يا اما نزيد على المنافسين و لا ننقص فكلا الحالتين.. غير 0,99 يا اما زيادة و لا نقصان..
خامس مشكل و اللي كلشي عارفو هو الفيرو.. و مرارا و تكرارا قلنا الأكسيسوارات التقنية و الإلكترونية هي المشكل الأول بعدو عليهم قدر الإمكان و لو فعلي إكسبريس تيتباعو راه عليإكسبريس و الشينوا عموما معندهمش مشكل مع التقليد كلشي يبيعوه ليك و قانونيا متاح عندهم... و كاين اللي غادي تلقا نفس المنتج عند المنافسين ليك فإيباي و لو فإيباي أخويا.. راه داكشي غادي تفضيلي نعم تيفضلو بائع على بائع آخر.. على حساب السمعة الفيدباك على حساب المبيعات.. على حساب واش طوب سيلار.. واش عندو سطور أو لا...
الحل ؟ انت باقي جديد فغير بعد على بحال هاد النوعية ديال المنتجات.. و بلاما نذاكرو على العلامات التجارية اللي غادي تلقاوهم فالصفحة ديال الفيرو اللي دايراها إيباي.. قلبو فيها مزيان.. عاد حطو المنتج ديالكم..
سادس مشكل و أنا تنعتابرو شخصيا اللغز اللي مبغاوش الدراري يتيقوه، راه إلا بغيتي تبيع راه خاصك بيسي و برامج و أدوات.. تليستي من التليفون أخويا غير نسى الحساب ديالك عاجلا أم آجلا.. ماشي تنحبط فيك أخويا. و لكن تنصارحك باش متصدمش و تقول معنديش الزهر.. مالهم دارو معايا بحال هاكا... تقدر دير متابعة للحساب ديالك من التليفون لكن تليستي منو و تصاوب المنتجات بالتليفون سمح لي مخداماش.. راه التليفون ماشي هو البيسي واخا تنديرو مود ويب.. راه والو.. الإمكانيات ديال البيسي بوحدها و إمكانيات الهاتف بوحدها..
سابع مشكل و هذا يقدر يكون غير باش تقوي الحضور ديالك على إيباي التصاور أخويا خدمهم بطريقة مهنية.. و فاش تنقول مهنية يعني شوف الشركات كيفاش تتخدم الكاطالوغ ديالها و دير بحالهم.. شوف كيفاش تيحطو ليك البرودوي.. راه تندخل لإيباي تنلقا شي أمثلة لباعة مغاربة أو بعض الجنسيات الأخرى.. و الله حتى تيبقاو فيا.. شي داير ليك الكادر فالجناب ديال التصويرة.. شي كاتب فري شبينغ و هو داير فالشبينغ 6 دولار.. شي داير تصاور مابينينش.. حيت تيستعمل برامج ماشي ديال معالجة الصور و التعديل على الصور... نركزو على هاد المسألة.. و عندكم كانفا دوت كوم راها مفيدة جدا إلى معندكش الإمكانية باش تخدم بالفوتوشوب أو شي برنامج شبيه ليه.. غير ما تقولش ليا شي تطبيق أو باوربوينت الله يرحم ليك الوالدين.. راه عيب صاحب مقاولة أو إيكوميرس و لا ويبماركتر و يخدم التصاور بتطبيق ديال الأندرويد أو باوربوينت... سمحو لي لكن هادشي اللي قريت و تعلمت...
دابا عرفنا علاش تيتسد لينا الكونط.. خاصنا نعرفو كيفاش نديرو إلا مشى لينا.. أول هام خاصنا نعيطو عليهم و نعاودو نعيطو عليهم مرة و زوج و عشرة.. مرة فالصباح.. مرة فالعشية.. حتى نلقاو اللي يفهمنا و يتفهمنا.. و يرجع لينا الكونط.. ما جابش الله.. و الغالب الله.. عيينا ما نشرحو ليهم و نقنعوهم.. والو مبغاوش.. هنا تنمشي ندير إيميل جديد.. تنصوب بيه بايبال جديد.. مربوط ببطاقة بنكية باسم من غير هداك اللي عندنا فالكونط اللي تسد.. يمكن نخدم بمعلومات خويا.. الواليد.. ماشي مشكل.. غير نحاول نبدا كلشي جديد.. بهاد المعلومات اللي عندي ديال الإيميل و البايبال.. تنمشي نفتح كونط فإيباي.. لكن ردو البال خاصنا ضروري نعرفو علاش تسد الكونط الأول باش منعاودش نطيح فنفس المشكل.. و نخسر كلشي تاني.. هنا تقدر تحط لينا هنا صورة من الإيميل اللي سيفطو ليك و نعطيوك المشكلة اللي وقعتي فيها و كيفاش تتفاداها مستقبلا... و راه ما عندكش علاش تبدل البيسي و لا البلاصة.. و المدينة.. و لا تحيد اللحية باش ميعرفوكش.. و لا حتى حاجة.. فقط المعلومات اللي تسجلتي بيها هي اللي تتبدل... و مديرش نص الخدمة.. تبغي تخدم بايبال قديم مع إيباي جديد.. راه فاش تتلينكيهم يعني تتعطيهم الرخصة يقلبو فبايبال ديالك و يعرفو كل المعلومات اللي فيه و هنا مباشرة و تلقائيا غادي يتسد حيت تسجلتي بيه عندهم من قبل و وقع فيه مشكل...
الخلاصة التجارة الإلكترونية راها خدمة و تتبغي حتى هي الإتقان و التضحية و ماشي لعب و فوضى.... و اللي قال ليك باللي ساهل تربح و لا ساهل دخل الفلوس راه غير تيضحك عليك.. نقدر نقول ليك أسرع وسيلة دير بيها الفلوس هي التجارة الإلكترونية و هي الدروبشبينغ على الخصوص.. لكن ماشي اسهل طريقة.. و أصلا ماكاينش اللي تيربح فلوس ساهلة.. غير إلا تيتاجر فالممنوعات و المفسدات و المحرمات...
و آخر حاجة نبدلو بيها العقلية، راه أحسن مجال هو التجارة.. و أحسن مجال فالتجارة هي التجارة الإلكترونية، و كونك تاجر راك وليتي صاحب مشروع و صاحب مقاولة.. إلا عندك روح الإدارة و روح القيادة غادي تمشي بعيد.. معندكش نصحك كمل قرايتك بسلام.. و شد ليك شي خديمة بسلام.. و عيش بسلام.. و لا شي صنعة.. أما عندك الرغبة تبني مستقبل ليك و لوليداتك و تفرح والديك فكون صاحب فكرة و صاحب مقاولة.. أنت هو المدير و هو القائد.. عرفتي أهم دور عند المدير فالشركة ؟ بكل بساطة هو يحل المشاكل.. يوميا تيحل المشاكل.. أما العمل راه كلها شاد البوسط ديالو.. ايوا حتا احنا بحال هاكا.. ديما من مشكل لمشكل.. نحل هاد المشكل باش ندوز لمشكل آخر.. و كاين اللي غادي يقول ليك شحال خاصني من ساعة باش نخدم فالإيكوميرس . غادي نقول ليه 24 ساعة خاصاك.. حتى و أنت ناعس تتحلم بأفكار جديدة بطرق جديدة.. و ديما تتعلم و تتجرب خدام باستمرار...
شفتي جيت نكتب خمسة ديال السطور صدقت فجريدة.. سمحو ليا على الإطالة.. و نتلقاو فالدروس القادمة... باقين تتسالوني الفيسبوك أدس.. و مايلينغ ليست.. ما ناسيش.. لكن و الله حتى خاصني الوقت فيهم.. حيت غادي يكونو فيديو باش تبان ليكم الخدمة كيفاش تدوز.... هذا ما كان....
في أمان الله...